"Nasaf" bosh murabbiyi Ro‘ziqul Berdiyev O‘zbekiston kubogi yarim final bosqichi doirasida bo‘lib o‘tgan AGMK klubiga qarshi o‘yin (2:1) borasida o‘z fikrlari bilan o‘rtoqlashdi.

— Bugun muxlislarimizning duosi, ularning stadiondagi yordami juda katta bo‘ldi. Bugun ularga haqiqiy quvonch ulashdik. Bundan juda ham xursandmiz. Finalda ham bor kuchimizni berib, ishqibozlarimizni xursand etishni maqsad qilganmiz va shu maqsad yo‘lida kurashamiz.

O‘yinni yaxshi boshladik va ko‘p vaziyatlar yaratdik. AGMK gol urgan vaziyatda esa e’tiboorni yo‘qotib qo‘ydik. Bugungi raqibimiz kuch edi. Bugun juda kuchli raqibni mag‘lub eta oldik. Ikkinchi bo‘limda esa o‘zgarishlarni amalga oshirib, o‘yinimizni kuchaytira oldik va g‘alabaga erishdik.

— "Nasaf" sakkizinchi marta finalga chiqdi. Jamoa 2 marta Kubokni qo‘lga kiritgan. Buxoroda o‘tadigan finalda jamoaning imkoniyatlarini qanday baholaysiz?
— Murabbiylar va futbolchilarning maqsadi ham Kubokni qo‘lga kiritish. Muxlislarimizning talabi ham shunday. Buning uchun bor kuchimizni berib harakat qilamiz. Finalda raqibning kim bo‘lishi ahamiyatga ega emas. "Navbahor" va "So‘g‘diyona"dan munosibi finalga chiqadi.

— Hakamlik borasida fikringiz.
— Bugun ularga e’tirozim yo‘q. Hakamlar vaziyatlarni ko‘rib, to‘g‘ri qarorlar qabul qilishdi, deb o‘ylayman.

— "Nasaf"ning so‘nggi paytdagi gollarini himoyachilar urishmoqda...
— Zamonaviy futbolda bo‘yi baland futbolchilardan foydalanish kerak. Shuning uchun standartlarga ko‘p e’tibor qaratyapmiz.

Uch markaziy himoyachi bilan o‘ynaganimizda qanot himoyachilarimizga ko‘p yuklama tushadi. Sherzod Nasrullayev va Dilshod Saitov charchab qolishdi. Shuning uchun ularning o‘rniga Sharof va Zafarmurodni tushirdik. Ular o‘yinga yaxshi kirishib ketishdi.

— Kubok o‘yinlarda darvozabon Umid Ergashevga yordam beryapsiz. Buning sababi nimada?
— Abduvohid Ne’matov va Umid Ergashev olimpiya terma jamoamizga nomzod o‘yinchilar hisoblanadi. "So‘g‘diyona"ga qarshi durang o‘ynganimizda Abduvohidning ozgina xatosi bo‘ldi. Shuning uchun bugun Umidga imkon berishga qaror qildik.