Superliganing 22-turidan o‘rin olgan "Paxtakor" - "Qo‘qon-1912" jamoalari o‘rtasidagi o‘yindan so‘ng (5:2) "sherlar" bosh murabbiyi Maksim Shaskix o‘yin haqidagi fikrlari bilan o‘rtoqlashdi.

"Birinchi bo‘limda ko‘p vaziyatlar yaratdik, biroq raqib ikki zarbasi bilan hisobni tenglashtirib ketdi. Ikkinchi bo‘limda tezlik qo‘shsak, barchasi joyida bo‘lishini sezib turgandik. Yanada keskinroq o‘ynay boshladik va buni natijada aks ettirdik. Chempionlik uchun kurash davom etadi. Oldinda bizda yana 4ta tur kutib turibdi. Biz o‘z o‘yinlarimizga e’tibor qaratib, ularga jiddiy tayyorlanishga urinishimiz kerak.

Bizda maydonlar sifatli bo‘lishini xohlardim. Nafaqat asosiy jamoalar, balki yoshlar, akademiya tarbiyalanuvchilari ham yaxshi maydonlarda shug‘ullanishi zarur. Shunda ularning mahorati ortib boradi. Futbolchi maydonga chiqqanda faqat raqib bilan kurashish haqida o‘ylashi lozim, boshqa narsalarni emas. Bizning sharoitda 8-9 oy quyosh charaqlab turishini hisobga olsak, bemalol sifatli maydonlarni ko‘paytirsa bo‘ladi. Bunga pul sababmi yoki yaxshi agronomlar yetishmayaptimi, bilmayman. Bu har bir klubning alohida muammosi" - dedi Shaskix.