"PSJ" hujumchisi Ferran Torres "Barselona"dan Parij klubiga o‘tishi qanday amalga oshgani va bu transferni faoliyatidagi o‘sish deb hisoblashi haqida gapirdi.
"Barselona"dan ketish oson bo‘ldi. Klublar o‘zaro gaplashib, kelishib olishdi. Men roziligimni berdim va bitim yakunlandi", dedi ispaniyalik futbolchi.
26 yoshli hujumchidan "Barselona"dan "PSJ"ga o‘tish uning faoliyatida oldinga tashlangan qadam bo‘lgan-bo‘lmagani ham so‘raldi.
"Ha. Ular hozirgi Yevropa chempionlari. Men ayni paytda Yevropa chempioni bo‘lib turgan jamoaga o‘tdim. Bu, shubhasiz, oldinga tashlangan qadam", dedi Torres.
Futbolchining bu fikri "Barselona" muxlislari orasida muhokamalarga sabab bo‘ldi. Ayni paytda "PSJ" Yevropaning amaldagi chempioni hisoblanadi va so‘nggi ikki mavsumda Chempionlar ligasida g‘olib chiqqan.
Torres 15 avgust kuni "Barselona"dan "PSJ"ga rasman o‘tgan. Parijliklar u bilan 2031 yilgacha shartnoma imzoladi. Klublar transfer summasini oshkor qilmagan bo‘lsa-da, xalqaro manbalar bitim qiymatini taxminan 50 mln yevro deb baholagan.
Ferran "Barselona" safida 207 ta o‘yin o‘tkazib, 65 ta gol urgan. Kataloniya klubi bilan u uch marta La Ligada g‘olib chiqqan va jami yettita sovrin qo‘lga kiritgan.
