Superliganing 22-turidan o‘rin olgan “Paxtakor” – “Qo‘qon-1912” (5:2) o‘yinidan so‘ng qo‘qonliklar bosh murabbiyi Davron Fayziyev jamoasi qanday xatolarga yo‘l qo‘yayotgani, Dragan Cheran haqida qanday fikrda ekani, “Paxtakor”ning kelajakdagi yulduzi kim bo‘lishi mumkinligi haqida gapirdi.
“Bugun birinchi taymda yomon o‘ynamadik, ammo yosh bolalarcha qilingan xatolar evaziga yakunda yirik hisobda yutqazdik”, - dedi Fayziyev.
“Dragan Cheran bugungi kunda chempionatimizning eng kuchli futbolchilaridan biri. Unday futbolchi bizda va boshqa jamoalarda ham yo‘q. Ammo, uning yoshi o‘tib borayotganini hisobga olish kerak. Ochig‘i, bugun menga Cherandan ham ko‘ra Abbos Fayzullayevning o‘yini yoqdi. U “Paxtakor”ning kelajakdagi yulduz futbolchisi bo‘lishi mumkin”.
“Jamoa yutqazsa murabbiy aybdor bo‘ladi. Buni to‘g‘ri qabul qilaman. Bugun menga muxlislarning hayqirishlarini ham to‘g‘ri qabul qilaman. Oldin ham aytganman. Men har qanday vaziyatga tayyorman, chunki murabbiyman va menga biriktirilgan vazifalar bor”.
“Maqsadimiz – Superligada qolish. Qolgan o‘yinlarda kerakli natijalarni qo‘lga kiritishga harakat qilamiz” - dedi qo‘qonliklar bosh murabbiyi.
