Суперлиганинг 22-туридан ўрин олган “Пахтакор” – “Қўқон-1912” (5:2) ўйинидан сўнг қўқонликлар бош мураббийи Даврон Файзиев жамоаси қандай хатоларга йўл қўяётгани, Драган Черан ҳақида қандай фикрда экани, “Пахтакор”нинг келажакдаги юлдузи ким бўлиши мумкинлиги ҳақида гапирди.

“Бугун биринчи таймда ёмон ўйнамадик, аммо ёш болаларча қилинган хатолар эвазига якунда йирик ҳисобда ютқаздик”, - деди Файзиев.

“Драган Черан бугунги кунда чемпионатимизнинг энг кучли футболчиларидан бири. Ундай футболчи бизда ва бошқа жамоаларда ҳам йўқ. Аммо, унинг ёши ўтиб бораётганини ҳисобга олиш керак. Очиғи, бугун менга Черандан ҳам кўра Аббос Файзуллаевнинг ўйини ёқди. У “Пахтакор”нинг келажакдаги юлдуз футболчиси бўлиши мумкин”.

“Жамоа ютқазса мураббий айбдор бўлади. Буни тўғри қабул қиламан. Бугун менга мухлисларнинг ҳайқиришларини ҳам тўғри қабул қиламан. Олдин ҳам айтганман. Мен ҳар қандай вазиятга тайёрман, чунки мураббийман ва менга бириктирилган вазифалар бор”.

“Мақсадимиз – Суперлигада қолиш. Қолган ўйинларда керакли натижаларни қўлга киритишга ҳаракат қиламиз” - деди қўқонликлар бош мураббийи.