Robert Levandovski Polsha terma jamoasining JCH-2022dagi raqiblari haqida o‘z fikri bilan o‘rtoqlashdi.
- Qatarda bo‘lib o‘tadigan jahon chempionatida Polsha bilan o‘ynaydigan Argentina, Meksika va Saudiya Arabistoni terma jamoalari haqida qanday fikrdasiz?
- Argentina haqida gap ketganda, ko‘p gapirishning hojati yo‘q. Bu eng kuchli jamoa. Menimcha, Argentina turnir favoritlaridan biri. Ularning eng muhim futbolchisi Leo Messi, haqiqiy afsona. Demak, bizni juda qiyin o‘yin kutib turganiga shubha yo‘q. Ko‘plab iqtidorli o‘yinchilarga ega bo‘lgan shunday yaxshi jamoa bilan uchrashish ajoyib bo‘ladi.
Meksika - final hushtagigacha taslim bo‘lmaydigan qiyin raqib. Ularda yoshlik va tajriba uyg‘unligi bor. Biz yaxshi bilamizki, meksikaliklar yirik turnirlarda yaxshi o‘ynay oladi. Biz uchun Meksika bilan o‘yin jiddiy sinov bo‘ladi.
Saudiya Arabistoni kutilmagan jamoa. Ularda kuchli himoya va yaxshi taktik tayyorgarlik borligini bilamiz. Saudiya Arabistoni hujumda yaxshi o‘ynay oladi. Shunday ekan, bu o‘yinga to‘g‘ri yondashishimiz kerak.
O‘ylaymanki, guruh bosqichiga yaxshi kayfiyat bilan boramiz. Biz har bir o‘yinga tabassum bilan kiramiz, garchi qiyin bo‘lishini bilsak ham”, - dedi “Barselona” hujumchisi.
Polsha 2022 yilgi jahon chempionatidagi ilk o‘yinini 22 noyabr kuni o‘tkazadi. Uning raqibi Meksika bo‘ladi.
