Роберт Левандовски Польша терма жамоасининг ЖЧ-2022даги рақиблари ҳақида ўз фикри билан ўртоқлашди.

- Қатарда бўлиб ўтадиган жаҳон чемпионатида Польша билан ўйнайдиган Аргентина, Мексика ва Саудия Арабистони терма жамоалари ҳақида қандай фикрдасиз?

- Аргентина ҳақида гап кетганда, кўп гапиришнинг ҳожати йўқ. Бу энг кучли жамоа. Менимча, Аргентина турнир фаворитларидан бири. Уларнинг энг муҳим футболчиси Лео Месси, ҳақиқий афсона. Демак, бизни жуда қийин ўйин кутиб турганига шубҳа йўқ. Кўплаб иқтидорли ўйинчиларга эга бўлган шундай яхши жамоа билан учрашиш ажойиб бўлади.

Мексика - финал ҳуштагигача таслим бўлмайдиган қийин рақиб. Уларда ёшлик ва тажриба уйғунлиги бор. Биз яхши биламизки, мексикаликлар йирик турнирларда яхши ўйнай олади. Биз учун Мексика билан ўйин жиддий синов бўлади.

Саудия Арабистони кутилмаган жамоа. Уларда кучли ҳимоя ва яхши тактик тайёргарлик борлигини биламиз. Саудия Арабистони ҳужумда яхши ўйнай олади. Шундай экан, бу ўйинга тўғри ёндашишимиз керак.

Ўйлайманки, гуруҳ босқичига яхши кайфият билан борамиз. Биз ҳар бир ўйинга табассум билан кирамиз, гарчи қийин бўлишини билсак ҳам”, - деди “Барселона” ҳужумчиси.

Польша 2022 йилги жаҳон чемпионатидаги илк ўйинини 22 ноябрь куни ўтказади. Унинг рақиби Мексика бўлади.