Britaniyalik tennis muxlislari go‘zal va latofatli Emma Radukanuni APL ishtirokchisi «Uotford»ga o‘xshatishmoqda.

Gap shundaki, angliyalik raketka ustasi yaqinda shaxsiy murabbiyini yana o‘zgartirdi. US Open turniri chempioni bu safar rossiyalik mutaxassis Dmitriy Tursunov bilan hamkorlikni muddatidan oldin to‘xtatdi. «Uotford» esa futbolda murabbiylarni qo‘lqopdek yangilashi bilan ajralib turibdi.

E’tiborlisi, Emma Radukanu sobiq tennischi Dmitriy Tursunov bilan ish boshlaganidan buyon atigi 15ta o‘yin o‘tkazib, ularning 8tasida g‘alaba qozongandi. Umuman, britaniyalik raketka ustasi oxirgi 15 oy davomida 4 nafar murabbiy qo‘l ostida shug‘ullandi va kortga tushdi. Buyuk Britaniyada Radukanuni «Uotford»ga qiyoslashayotgani bejiz emas, albatta. Binobarin, bu klub so‘nggi yillarda murabbiylarga o‘zgacha munosabatda bo‘lmoqda. har holda, 2020 yildan buyon «Uotford» naq 7 nafar bosh murabbiyni ko‘rdi.

Radukanu o‘z murabbiyini yana o‘zgartirgani haqida xabar berilgach, ijtimoiy tarmoqlarda hazilomuz izohlar to‘lib ketdi. Jumladan, foydalanuvchilardan biri bunga juda chiroyli va o‘rinli tarzda munosabat bildirdi: «To‘xtang, «Uotford»ga bog‘liq yangilik tennis ruknida nima qilmoqda?» Xullas, Emma Radukanu bir aylanib, tennis olamidagi «Uotford»ga aylandi-qo‘ydi...