"Manchester Yunayted" bugun APLning navbatdagi turi oldidan Londonga tashrif buyuradi. "Qizil iblislar" "Chelsi"ga qarshi maydonga tushishi kerak. Ten Xag esa ushbu bahsda jamoaning ikki hujumchisidan foydalana olmaydi. Xususan, Ronaldu asosiy tarkibdan chetlatilgan bo‘lsa, Marsyalda jarohat mavjud. Quyida mana shunday holatda, "MYU"ning tarkibi qanday ko‘rinish olishi haqida so‘z boradi.

37 yoshli Ronaldu "Tottenxem" bilan bahsda maydonga tushishdan bosh tortib, maydonni final hushtagidan avval tark etgandi. Aynan shu sabab klublar doirasida 700 ta golga mualliflik qilgan yulduz, asosiy jamoadan ajratib qo‘yildi. Bunday voqea mavsum boshida, "Rayo Valyekano"ga qarshi bahsda ham ko‘zga tashlangan edi. Shundan keyin Erik ten Xag holatga jiddiy reaksiya bildirishga majbur bo‘ldi. U Ronalduni jamoadan chetlatdi. Bu haqida niderlandiyalik mutaxassis shunday deydi: "Men Ronalduni birinchi martadan keyin ogohlantirganman. Siz futbolchi bo‘lsangiz, jamoa bilan birga bo‘lishni bilishingiz kerak. Chunki bu jamoaviy sport turi. Hamma bir xil standartlarga ko‘nikishga majbur. Men bu yerda bosh murabbiyman. Shuning uchun jamoadagi atmosfera, madaniyat va munosabatlarga javobgarman. Jamoada qadriyat bo‘lsagina, u shakllanadi".

Xo‘sh, endi "MYU"ning bugungi o‘yinga tayyorlab qo‘ygan taxminiy tarkibiga to‘xtalsak. Darvozada David De Xea bo‘ladi. Uning oldida markaziy himoyachilar Rafael Varan hamda Lisandro Martines harakat qiladi. Qanotlar Diyegu Dalot hamda Lyuk Shouga ishonib topshiriladi. Tayanch yarim himoyasida ikki hamyurtlar, Fred hamda Kazemiro maydonga tushiriladi. Hujumkor chiziqda Brunu Fernandesh, uning ikki tomonida Jeydon Sancho hamda Antoni bo‘lishi kutilmoqda.
Nominal hujum chizig‘ida Antoni Elanga harakat qiladi. Uning o‘rni esa, kezi kelganda Markuz Reshfordga beriladi.
Shuningdek, Fredning o‘rnida boshlang‘ich tarkibga Kristian Eriksen ham qo‘shilishi mumkin.

ISMATOV J.