Bugun Superligada 23-tur start oladi. Doimgidek yaxshi o‘yinlar bor. Ushbu tur haqida O‘zPFL bosh direktori Diyor Imomxo‘jayev o‘z fikrlarini bildirdi.

"Surxon" — "Qizilqum" to‘qnashuvining markazida Hamid Aktamov turibdi. Amaldagi va sobiq jamoasi o‘ynaydi. "Qizilqum"ning 2022 yilgi mavsum uchun seleksiyasida Aktamov bevosita ishtirok etgandi. Bugun Navoiy sharafini himoya qilayotgan futbolchilarning g‘ururi va ori sinovdan o‘tadi, deyish mumkin.

"Paxtakor" — "Lokomotiv". Toshkent derbisi har qachongidan qiziqarliroq, zavqliroq. Har ikkisiga ochko suv va havodek zarur. "Paxtakor" chempionlik uchun, "Lokomotiv" ligada jon saqlash uchun kurashyapti. Bir necha yillar oldin shunday to‘qnashuvlar "Paxtakor" — "Traktor" o‘rtasida o‘tar va odatda ochko kimga ko‘proq kerak bo‘lsa, o‘shaning g‘olib chiqishi osonroq bo‘lardi. Bugun esa futbol o‘zgargan, deb ishonyapmiz. Bugun ochko ulashilinmaydi, bugun ochko sug‘urib olinadi.

Kubok finali oldidan "Nasaf" ham, "Navbahor" ham o‘z muxlislari ko‘z o‘ngida maydonga chiqadi. Raqiblar juda o‘xshash, turnir jadvali ekvatorida ekanidan tortib, asosan yoshlarga suyanayotganigacha bir xil. Bu "Paxtakor" hamshaharlariga, "Nasaf" va "Navbahor" esa faqat va faqat o‘ziga ishonishi kerak bo‘lgan tur.

So‘nggi kunda Qosimov va Abramov to‘qnashuvi bor. Albatta ilk g‘alabadan ko‘ra liga ishtirokchilari sonini oshirish haqida qayg‘urish osonroq, biz bunga ko‘nikib ketganmiz. Shundan kelib chiqib, Yaypandagi to‘qnashuvga ortiqcha izohga shart emas, deb o‘tib ketamiz. Har qanday holatda ham bu o‘yin dahshatli bo‘ladi" - deb post qoldirdi Diyor Imomxo‘jayev.