“Lokomotiv”ga qarshi o‘yinda muxlislar olqishiga sazovor bo‘lgan Abbosbek Fayzullayev uchrashuvdan keyin intervyu berdi.
"G‘alaba bilan barcha muxlislarimizni tabriklayman. Bahs qiyin bo‘lishini bilgan edik, shuning uchun o‘yinga tayyorgarlik jarayonida raqibimizni ancha puxta o‘rganib chiqdik. Raqibimiz o‘yinlarini ko‘rib chiqdik, birinchi bo‘limdagi vaziyatlardan foydalanganimiz tufayli o‘yinda g‘alaba qozondik deb o‘ylayman.
Birinchi bo‘limdagi yorqin o‘yindan keyin ikkinchi bo‘limda sur’at ancha sekinlashdi. Bunga nima sabab bo‘ldi?
- Ikkinchi bo‘limdagi o‘yin sur’atida bo‘lgan pasayishni birinchi bo‘lim ikkala jamoa uchun ham qiyin kechgani bilan izohlayman. Biz ko‘p kuch sarfladik. Mavsum oxiri bo‘lgani sabab jamoalarda charchoq alomatlari bor.
Qolgan uchta bahsda jamoaning maqsadlari qanday?
- Birinchi navbatda biz har doim g‘alaba uchun maydonga chiqamiz. Mavsum oxiridagi maqsadimiz chiroyli o‘yin ko‘rsatish va oltin medallarni qo‘lga kiritish" - dedi Fayzullayev.
