"Nasaf" bosh murabbiyi Ro‘ziqul Berdiyev Superliganing 23-turi doirasida bo‘lib o‘tgan "Bunyodkor"ga qarshi o‘yindan so‘ng o‘z fikrini bildirib o‘tdi.

"O‘yinning oxiri juda alamli bo‘ldi. G‘alabaga yaqin edik. Afsuski, vaziyatlardan ham foydalana olmadik, penaltini ham noaniq bajardik. Albatta, bu alamli. Bugun yo‘qotilgan 2 ochko bizga juda zarur edi.

O‘zi oxirgi 3ta o‘yinning birinchi bo‘limida juda sust harakat qilyapmiz. Ustiga ustak, AGMK, "Qizilqum"ga qarshi va bugungi uchrashuvda ham birinchi bo‘limni yomon o‘tkazib, ikkinchi bo‘limda vaziyatni o‘zgartirishga harakat qildik.

"Bunyodkor" bugun yaxshi himoyalanib, e’tiborini qarshi hujumga qaratdi. Biz esa g‘alaba uchun juda ham ko‘p vaziyatlar yarata oldik. Ammo ulardan foydalana olmadik. Raqibni ham tushunish mumkin, ular bizning ochko yo‘qotishimiz uchun harakat qilishyapti.

Hali hammasi o‘z qo‘limizda, oxirigacha kurashamiz va o‘z maqsadimizga erishamiz. Bizda imkoniyat yaxshi. Buni qo‘ldan qo‘ldan chiqarmasligimiz kerak.

Husayn Norchayev jarohat olgani uchun uni almashtirishga majbur bo‘ldim. Shifokorlarning aytishicha, uning jarohati jiddiy emas, yelkasidan lat yepti. Keyingi bahsgacha u tayyor bo‘ladi.

Bizda odatda penaltini Husayn ko‘proq amalga oshirardi. Marko esa tajribali o‘yinchi sifatida mas’uliyatni o‘z zimmasiga oldi. Bugungi durang natija ayb faqat Markoda emas. O‘tkazib yuborilgan golda himoyachilarning aybi bor, vaziyatlardan foydalanishda hujumchilar pand berishdi.

30 oktyabr kuni bizni O‘zbekiston kubogi final o‘yini kutib turibdi. Biz bugundanoq bu o‘yinga tayyorgarlikni boshladik. Bekorga finalgacha yetib kelmaganimizni isbotlashga urinamiz. Kubokni qo‘lga kiritish maqsadimiz bor. "Navbahor" safida tajribali futbolchilar ko‘p. Bu eng tartibli jamoa hisoblanadi. Ikki jamoa finalda munosib o‘yin ko‘rsatadi, deb o‘ylayman", — dedi Ro‘ziqul Berdiyev.