Islandiya poytaxti Rekyavik shahrida umumiy mukofot jamg‘armasi 400 000 dollarni tashkil etuvchi «Fischer Random World Chempionship-2022» turnirining guruh bosqichi yakuniga yetdi.

Hamyurtimiz Nodirbek Abdusattorov kecha 5 va 6-tur doirasida rossiyalik Yan Nepomnyashchiy va AQSHlik So Uesliga qarshi dona surdi. Vatandoshimiz rus shaxmatchisini har ikkala partiyada mag‘lub etdi. Ueslga qarshi o‘yinlarda esa Nodirbek bir durang va bir mag‘lubiyat qayd etdi. Shu tariqa, Abdussatorov "A" guruhida 12 imkoniyatdan 10 ochko jamg‘arib, guruh g‘olibiga aylandi.

«B» guruhini norvegiyalik Magnus Karlsen 8,0 ochko bilan 1-o‘rinda, Hikaru Nakamura 7,5 ochko bilan 2-o‘rinda yakunladi. Umimiy hisobda ham eng yuqori natija ko‘rsatgan Abdusattorovni FIDE mutaxassislari e’tirof etishdi.

Yarim final bahslari 29-oktyabr, shanba kuni Toshkent vaqti bilan 20:00 da boshlanadi. Nodirbek «A» guruhi g‘olibi sifatida «B» guruhining 2-o‘rin sohibi Hikaru Nakamura bilan, «B» guruhi g‘olibi Magnus Karlsen esa «A» guruhini 2-o‘rinda yakunlagan Yan Nepomnyashiy bilan final uchun omadlarini sinab ko‘rishadi.