Chempionlar Ligasi pley-off bosqichiga chiqa olmagan «Barselona»ning iqtisodiy zararlari ma’lum bo‘ldi.

Joriy mavsum turnirda kataloniyaliklar 67,18 million yevro ishlab oldi, shu jumladan, 34,11 million tarixiy reytingi uchun berildi. Guruh bosqichining so‘nggi turida «Barselona» «Viktoriya» ustidan g‘alaba qozonsa, 2,7 million yevro, durang natija uchun 900 ming yevro oladi.

«Ko‘k-anorranglilar» YECHLning chorak finaliga qadar yetib borishni maqsad qilgan va buni mavsum byudjetiga kiritgan edi. Guruhdan chiqqanlik uchun 9,6 million yevro, 1/4 finalga chiqish 10,6 million yevro daromad olib kelishi kerak edi. Shu tariqa «Barselona» rejalashtirganidan 20,2 million yevro kam oladigan bo‘ldi.

Yevropa Ligasidagi ishtirok uchun esa jamoa maksimum 14,9 million yevro daromad qilishi mumkin — turnir g‘olibligi shuncha pul keltiradi.

2021/22 yilgi mavsumda kataloniyaliklar Chempionlar Ligasi guruh bosqichi va Yevropa Ligasining 1/4 final bosqichidagi yurishini to‘xtatgani sababli yo‘qotishlarni 12 million yevroga baholagan edi.

Eslatib o‘tamiz Xavi shogirdlari nufuzli musobaqaning C guruhida 4 ochko bilan 3-o‘rinni egallab turibdi va pley-off bosqichi yo‘llanmasidan quruq qoldi.