“Navbahor” hamda “Nasaf” jamoalari o‘rtasidagi O‘zbekiston kubogi final uchrashuvidan (1:2) so‘ng matbuot anjumani bo‘lib o‘tdi. Uning ikkinchi qismida qarshiliklar ustozi Ro‘ziqul Berdiyev hamda o‘yinning eng yaxshi futbolchisi Lima Kruz Mateus ishtirok etdi.

“Birinchi bo‘limda mazmunli sifatli o‘yin ko‘rsatdik. Ikkinchi taym o‘rtasiga qadar bu darajani saqlab turdik. Ammo gol o‘tkazib yubordik. Balki, bu charchoq alomatidir.

Qo‘shimcha bo‘limlarda esa yigitlar qiyin bo‘lsada, o‘zlarida kuch topa bilishdi va raqib darvozasiga gol kiritishga muvaffaq bo‘ldik. Albatta, bu g‘alabaga barcha o‘z hissasini qo‘shdi.

Ta’kidlab o‘tish lozim, ikkinchi kiritgan golimizda Abdurahmatov o‘z mahoratini namoyish etdi. O‘ylashimcha, barchani xursand qilgan g‘alabaga erishdik.

Oliy maqsadimiz Superliga g‘olibligiga qaratilgan. Yigitlar bilan gaplashib oldik, biz hozirdanoq “Dinamo” bilan o‘yinga tayyorgarlikni boshlashimiz zarur", – dedi Berdiyev.