APLning so‘ngi turida ko‘p narsa o‘zgardi. Xususan, "Arsenal" mavsumning ayni damdagi natijasiga ko‘ra, o‘z tarixidagi eng ko‘p ochkoni jamg‘ardi. London klubi bir durang, bir mag‘lubiyat va 10 g‘alaba bilan, 12 turdan keyin faqat 5 ochko yo‘qotgan. Mikel Arteta shogirdlari chempionlikni himoya qilayotgan Gvardiola jamoasidan 2 ochko oldinda bormoqda. Jahon chempionatiga qadar esa atigi ikki tur qolgan xolos. Agarda "Arsenal" shu tempda davom eta olsa, u holda tarixidagi yangi rekordga erishadi. "the Sun" nashri bu haqida ma’lum qildi.

Hisob-kitoblarga ko‘ra, "Arsenal"ning o‘yinida ortiq pasayish yuz bermasa, jamoa mavsum so‘ngida 99 ochko bilan chempionga aylanishi mumkin. Shimoliy London jamoasi yangi tarixda, 1992 yildan beri eng ko‘p ochkoni 2003-2004 yilda qo‘lga kiritgan (90). O‘shanda "Arsenal" 38 turni mag‘lubiyatsiz yakunlagandi. Ammo, o‘shanda Arsen Venger shogirdlari 38 turning 12 tasida durang o‘ynagan. Hozirgi "Arsenal" esa bu rekordni buzib tashlab, 18 yillik sabrga chek qo‘yish imkoniyatiga ega.

Maxsus dasturiy ta’minotning ma’lumotlarida qayd etilishicha, "Manchester Siti" bu mavsumni 92 ochko bilan, ikkinchi o‘rinda tugatadi. Uchinchi pog‘onada "Tottenxem" bo‘lishi aytilgan. "Shporlar"da 76 ochko mavjud bo‘ladi. "MYU" (73) va "Nyukasl" (70) kuchli beshlikni yakunlab beradi. Oltinchi o‘rinda 67 ochko to‘plagan "Chelsi" joylashadi. Keyingi pog‘onadagi klub "Brayton" bo‘lishi aytilgan. "Chag‘alaylar" 57 ochko to‘plashi ehtimollar nazariyasiga kiritilgan.

Ushbu ehtimoliy jadvaldagi "syurpriz" bu "Liverpul"dir. Mersisaydliklar mavsumni 51 ochko bilan, 9 o‘rinda tugatishi aytilgan. Klopp jamoasi hozirga qadar 12 turda 4 ta g‘alabaga erishdi xolos. Kuchli o‘nlikni Londonning yana bir jamoasi bo‘lmish "Kristal Pelas" yakunlab beradi. Patrik Viyeyra boshchiligidagi futbolchilar ham "Liverpul" kabi 51 ochko yig‘ishi taxmin qilingan.

ISMATOV J.