Superliga 24-turidan o‘rin olgan “Paxtakor” – “So‘g‘diyona” (2:0) o‘yinidan so‘ng mehmon jamoa ustozi Ulug‘bek Baqoyev bugun raqib mahorat bobida jamoasidan ustun ekanini, amaldagi shartnomasi va rahbariyat tomonidan qo‘yilgan vazifalar borasida fikr yuritdi.

“Bugun amaldagi chempionga qarshi o‘ynadik. Yigitlarga raqib kichik xatolarni ham kechirmasligini uqtirgandik. Birinchi taym avvalida xato qildik va Hamdamov chiroyli gol urdi. Ikkinchi bo‘limda ham xato. Rikoshet va gol”, - deydi Baqoyev.

“Raqib futbolchilarining mahorati bugun bizdan ustun edi. Bugungi o‘yin uchun yigitlarimga rahmat aytaman. Oldinda yana ikki o‘yin qoldi va ularda munosib ishtirok etishni istaymiz”.

“Shartnomam mavsum oxiriga qadar amal qiladi. Professional tarzda o‘z ishimni bajaraman”.

“Shunchaki xohish bilan barchasi amalga oshmaydi. Qatnashgan barcha musobaqalarda g‘alaba uchun o‘ynadik. Rahbariyat bizga har bir o‘yin va har bir musobaqada g‘olib bo‘lish vazifasini qo‘ygan edi”.