Суперлига 24-туридан ўрин олган “Пахтакор” – “Сўғдиёна” (2:0) ўйинидан сўнг меҳмон жамоа устози Улуғбек Бақоев бугун рақиб маҳорат бобида жамоасидан устун эканини, амалдаги шартномаси ва раҳбарият томонидан қўйилган вазифалар борасида фикр юритди.

“Бугун амалдаги чемпионга қарши ўйнадик. Йигитларга рақиб кичик хатоларни ҳам кечирмаслигини уқтиргандик. Биринчи тайм аввалида хато қилдик ва Ҳамдамов чиройли гол урди. Иккинчи бўлимда ҳам хато. Рикошет ва гол”, - дейди Бақоев.

“Рақиб футболчиларининг маҳорати бугун биздан устун эди. Бугунги ўйин учун йигитларимга раҳмат айтаман. Олдинда яна икки ўйин қолди ва уларда муносиб иштирок этишни истаймиз”.

“Шартномам мавсум охирига қадар амал қилади. Профессионал тарзда ўз ишимни бажараман”.

“Шунчаки хоҳиш билан барчаси амалга ошмайди. Қатнашган барча мусобақаларда ғалаба учун ўйнадик. Раҳбарият бизга ҳар бир ўйин ва ҳар бир мусобақада ғолиб бўлиш вазифасини қўйган эди”.