Superliga 24-turidan o‘rin olgan “Qizilqum” – “Qo‘qon-1912” (1:1) o‘yinidan so‘ng mehmonlar bosh murabbiyi Davron Fayziyev ruhiy bosim va Norbekovning o‘yini haqida fikr bildirdi.
“Bugun yutishimiz ham yutqazishimiz ham mumkin edi. Birinchi taymda rejalarimiz amalga oshdi. Birinchi bo‘lib gol urdik va hammasi yaxshi ketayotgan edi. Baribir, o‘z uyida o‘ynayotgan “Qizilqum” shiddatni oshirdi va gol urdi. Yetakchilarimizning yo‘qligi ham sezildi”, - deydi Fayziyev.
“Balki mahorat, balki ruhiy bosim bizga halaqit qilgan bo‘lishi mumkin. Ruhiy bosim, bugun turnir jadvalidagi o‘rnimizdan kelib chiqadi. Natijaga e’tibor berib o‘ynayapmiz”.
“”Qizilqum” ko‘proq oldinga chiqishini hisobga olib, Norbekovning erkin harakat qilishini biroz cheklagan edik. Unga bo‘sh xududlar zarur edi. Oxirgi zarbalarda sovuqqonlik etishmadi. Uning bugun ko‘rsatgan o‘yiniga e’tiroz yo‘q”.
“Bugun faqat g‘alaba uchun kelgandik. Umumiy hisobda o‘ninchi bor durang o‘ynadik. Bu ochko bizga qanchalik muhim bo‘lganini mavsum oxirida bilamiz”.
