Суперлига 24-туридан ўрин олган “Қизилқум” – “Қўқон-1912” (1:1) ўйинидан сўнг меҳмонлар бош мураббийи Даврон Файзиев руҳий босим ва Норбековнинг ўйини ҳақида фикр билдирди.
“Бугун ютишимиз ҳам ютқазишимиз ҳам мумкин эди. Биринчи таймда режаларимиз амалга ошди. Биринчи бўлиб гол урдик ва ҳаммаси яхши кетаётган эди. Барибир, ўз уйида ўйнаётган “Қизилқум” шиддатни оширди ва гол урди. Етакчиларимизнинг йўқлиги ҳам сезилди”, - дейди Файзиев.
“Балки маҳорат, балки руҳий босим бизга ҳалақит қилган бўлиши мумкин. Руҳий босим, бугун турнир жадвалидаги ўрнимиздан келиб чиқади. Натижага эътибор бериб ўйнаяпмиз”.
“”Қизилқум” кўпроқ олдинга чиқишини ҳисобга олиб, Норбековнинг эркин ҳаракат қилишини бироз чеклаган эдик. Унга бўш худудлар зарур эди. Охирги зарбаларда совуққонлик этишмади. Унинг бугун кўрсатган ўйинига эътироз йўқ”.
“Бугун фақат ғалаба учун келгандик. Умумий ҳисобда ўнинчи бор дуранг ўйнадик. Бу очко бизга қанчалик муҳим бўлганини мавсум охирида биламиз”.
