"Milan" hujumchisi Zlatan Ibrahimovich Kilian Mbappe "Real"ga o‘tish o‘rniga "PSJ" bilan shartnomasini uzaytirish qarori haqida gapirdi.
41 yoshli shvesiyalik hujumchi Mbappeni fantastik futbolchi deb atadi, shu bilan birga uning keyingi rivojlanishiga ota-onasi, agentlari, advokatlari va murabbiylari to‘sqinlik qilayotganini ta’kidladi.
"U Parij uchun to‘g‘ri qaror qabul qildi, lekin o‘zi uchun emas. U klubdan muhimroq bo‘lgan vaziyatni yaratdi. Lekin siz hech qachon klubdan ortiq bo‘lolmaysiz. Bunga sabab uning ota-onasi, advokatlari, agentlari, murabbiylari. Hozir yangi avlodning ota-onalari o‘zlari yulduz bo‘lishganiga ishonishadi. Lekin ular kimlar? Og‘zini yopishlari kerak! O‘g‘lingiz ishlashi va intizomli bo‘lishi kerak", - dedi Ibrahimovich Marca bilan suhbatda.
23 yoshli Mbappening parijliklar klubi bilan amaldagi shartnomasi 2025 yilning yoziga qadar mo‘ljallangan. Transfermarkt portali fransiyalik hujumchini 160 million yevroga baholamoqda.
Joriy mavsumda forvard "PSJ" safida 18 ta o‘yinda maydonga tushib, 18 ta gol va 5 ta golli uzatmaga mualliflik qilgan.
