Madridning “Real” klubi bosh murabbiyi Karlo Anchelotti yarim himoyachi Aureliyen Tchuamenining tiklanish vaqti haqida gapirdi. Eslatib o‘tamiz, futbolchi jarohati tufayli "qaymoqranglilar"ning so‘nggi o‘yinlarini o‘tkazib yuborgandi.
“Bu mushak jarohati emas, balki oxirgi kunlarda uni bezovta qilayotgan tendinit. U o‘zini yaxshi his qilmoqda. O‘ylaymanki, u dushanba kuni “Rayo Valyekano”ga qarshi o‘ynaydi”, — dedi Anchelotti Chempionlar Ligasida “Seltik” ustidan qozonilgan g‘alabadan so‘ng matbuot anjumanida.
Eslatib o‘tamiz, Tchuameni shu yozda "Monako"dan ko‘chib o‘tgandan so‘ng darhol "Real"ning asosiy yarim himoyachisiga aylandi. Transfer summasi "qirollik klubi"ga 80 million yevro atrofida tushdi.
