Superliga 25-turidan o‘rin olgan “Metallurg” – “Navbahor” (0:1) uchrashuvidan keyingi matbuot anjumanining birinchi qismida mehmonlar ustozi Samvel Babayan ishtirok etib, OAV xodimlarining savollariga javob berdi. Samvel Vyacheslavovich odatdagidek o‘z so‘zini o‘yin haqidagi fikrlari bilan boshladi.

- Barchaga xayrli kech. Bugungi uchrashuv avvalo iroda namoyish etiladigan o‘yin bo‘ldi. Yigitlar g‘alaba juda muhimligini ko‘rsatib berishdi. Futbolchilarimiz bor kuchlarini ishga solishdi. Muxlislarni bugungi yutuq bilan tabriklayman, yigitlardan minnatdorman.

- Zoran Marushich nega almashtirildi? Jasur Yaxshiboyev nega tarkibda yo‘q edi?

- Yaxshiboyev haqida to‘xtaladigan bo‘lsak, u bemor. Sababi shu. Marushich katta hajmdagi ishni bajardi va uning charchaganini ko‘rganimdan so‘ng, almashtirishga qaror qildim.

- Bugun Jokichning yo‘qligi qay darajada sezildi?

- Yovan Jokich biz uchun muhim futbolchi, ammo Azimjon Ahmedov ushbu pozisiyada munosib o‘yin ko‘rsatib, Jokichning yo‘qligini bildirmadi.

- So‘nggi turda “Paxtakor” “Bunyodkor”ga qarshi o‘ynaydi. “Navbahor” g‘alaba uchun “Bunyodkor”ga moliyaviy rag‘batlantirish taklif qilishi mumkinmi?

- Yo‘q. Biz bunday ishlar bilan shug‘ullanmaymiz. “Navbahor” faqat o‘z o‘yiniga e’tibor qaratadi.