Суперлига 25-туридан ўрин олган “Металлург” – “Навбаҳор” (0:1) учрашувидан кейинги матбуот анжуманининг биринчи қисмида меҳмонлар устози Самвел Бабаян иштирок этиб, ОАВ ходимларининг саволларига жавоб берди. Самвел Вячеславович одатдагидек ўз сўзини ўйин ҳақидаги фикрлари билан бошлади.
- Барчага хайрли кеч. Бугунги учрашув аввало ирода намойиш этиладиган ўйин бўлди. Йигитлар ғалаба жуда муҳимлигини кўрсатиб беришди. Футболчиларимиз бор кучларини ишга солишди. Мухлисларни бугунги ютуқ билан табриклайман, йигитлардан миннатдорман.
- Зоран Марушич нега алмаштирилди? Жасур Яхшибоев нега таркибда йўқ эди?
- Яхшибоев ҳақида тўхталадиган бўлсак, у бемор. Сабаби шу. Марушич катта ҳажмдаги ишни бажарди ва унинг чарчаганини кўрганимдан сўнг, алмаштиришга қарор қилдим.
- Бугун Жокичнинг йўқлиги қай даражада сезилди?
- Йован Жокич биз учун муҳим футболчи, аммо Азимжон Аҳмедов ушбу позицияда муносиб ўйин кўрсатиб, Жокичнинг йўқлигини билдирмади.
- Сўнгги турда “Пахтакор” “Бунёдкор”га қарши ўйнайди. “Навбаҳор” ғалаба учун “Бунёдкор”га молиявий рағбатлантириш таклиф қилиши мумкинми?
- Йўқ. Биз бундай ишлар билан шуғулланмаймиз. “Навбаҳор” фақат ўз ўйинига эътибор қаратади.
