Namangan FMM U16 bosh murabbiyi Mamajonov hamda Buxoro FMM U16 murabbiyi Sharipov kelishilgan o‘yinda ishtirok etgani uchun 1 yil muddatga futboldan chetlashtirilibdi. O‘smirlar futboli shunday bulg‘anayotgan bo‘lsa, bu noinsoflar futbolga qaytib kelmasa ham mayli. Viloyat jamoasini sharmanda qilish katta xato. Vatan ostonadan boshlanadi. Yosh futbolchi to terma jamoa darajasiga yetguniga qadar, u to‘p surayotgan viloyat jamoasi shu futbolchi uchun bosh jamoa hisoblanadi.

Har qanday futbol muxlisida faqat yoshlar jazolanadimi, degan haqli savol tug‘iladi. O‘zPFL ayrim katta jamoalar ishtirokidagi konkret o‘yinlarga nisbatan o‘zining jiddiy xavotirini bildirgan. O‘FA inspeksiyasi mazkur o‘yinlar masalasida ishlayapti. Yil avvalida futbolchilarga Futbolchilar uyushmasi tomonidan red button kartalari tarqatilganini unutmaslik kerak. Biror qing‘ir ishni ko‘ra-bila turib, bu haqda xabar bermaslik futbolchini jazodan saqlamaydi.

Kelishilgan o‘yinlarni faktlari bilan ochiqlash o‘ta mushkul ish, ammo ilojsiz emas. O‘z vaqtida bir qator hakamlar futboldan chetlashtirilgani, Turg‘unboyev, Jaloliddinov kabi ishlar ochilganini hech kim yodidan chiqarmasligi shart. Biz loqaydlik tarafdori emasmiz. Bir narsaga aniq ishonamiz, normal shaxslar va jamoalar uchun reputasiya, muxlislar mehri ahamiyatsiz masala emas hamda ular reputasiyasi yaxshi bo‘lmagan qandaydir shubhali mutaxassisni, futbolchini o‘ziga jalb qilmaydi.

Futbol o‘zgaryapti, yaxshilanyapti. Va tan olishimiz kerakki, kamayib borayotgan bo‘lsa-da, kalamushlar hali ham bor. Haromdan qo‘rqmayotgan bundaylarni vaqti kelib xalq faktlari bilan tanib oladi deb umid qilamiz.

Diyor Imomxo‘jayev.