Iordaniyaning Amman shahrida boks bo‘yicha Osiyo chempionatida yarim final bahslari doirasida kechki dasturdan o‘rin olgan janglar davom ettirilmoqda.

80 kilogramm vaznda qit’a chempionatiga borgan Odilon Aslonov final yo‘llanmasi uchun qirg‘izistonlik Omurbek Bekjigit o‘g‘liga qarshi bahslashdi.

Bokschilar butun jang davomida bir-birlariga ochiq kurash taklif etishdi. Raqib bokschisi Aslonovning ko‘plab zarbalarini ko‘tara olgani tahsinga loyiq. Vatandoshimiz jangni 4:1 hisobida o‘z foydasiga hal qildi — 30:27, 30:27, 30:27, 29:28, 28:29.

Shu tariqa, finalga chiqqan O‘zbekiston erkaklar terma jamoasi a’zolari soni 6 nafarga yetdi. Avvalroq Saidjamshid Ja’farov, Lazizbek Mullojonov, Hasanboy Do‘smatov, Abdumalik Xalakov va Ruslan Abdullayev finalga yo‘l olgan, Shahzod Muzaffarov, Adhamjon Muhiddinov va Asadxo‘ja Mo‘ydinxo‘jayev yarim finalda yengilib, bronza medaliga ega chiqqani xabar qilingandi.

10 noyabr kuni yana quyidagi bokschi o‘z jangini o‘tkazadi:

-92 kg: Madiyor Saidrahimov — Ahmat Sulayman (Iordaniya) (22:30 dan so‘ng)