Kechagina Garet Sautgeyt Jahon chempionati uchun o‘zining tanlovlarini e’lon qildi. Ro‘yxatdan 26 ta futbolchi joy olgan bo‘lib, yig‘ilgan futbolchilar Angliya tarixidagi eng tajribali jamoalardan biriga aylandi.

Jamoadan joy olgan 26 futbolchining termadagi o‘yinlari qo‘shib hisoblab chiqilganida, umumiy 820 bahs o‘tkazilganligi ma’lum bo‘ldi. Bu esa mutlaq rekorddan 1 taga kamdir. Bu borada birinchi o‘rinni 2010 yilgi Jahon chempionatiga olib ketilgan tarkib egallagan. O‘shanda jamoaga Fabio Kapello boshchilik qilgan. Jamoaning umumiy bahslari soni 821 ta bo‘lgan. 2010 yilgi tarkibda Ueyn Runi, Stiven Jerrard, Frenk Lempard kabi taniqli yulduzlar bor edi. Shuningdek, terma jamoada o‘yin o‘tkazish borasida Eshli Koul, Devid Jeyms, Jon Terri, Jermeyn Defo hamda Jo Koul oldingi o‘rinlarni egallagan. Biroq, bu statistikalar Janubiy Afrika zaminida inglizlarga yordam bera olmagan. Ular nimchorak finalda Germaniyaga 4-1 hisobida imkoniyatni boy berib, ortga qaytishga majbur bo‘lgan.

Angliyaning bugungi tarkibi ham juda tajribali. Ular ichida Raxim Sterling (79), Xarri Keyn (75), Kayl Uoker (70) Jordan Xenderson (70) eng ko‘p maydonga tushirilgan o‘yinchilar sanaladi. Shuningdek, jamoada bir nechta yangi va tajribasiz futbolchilar ham bor. Jeyms Meddison (1), Eron Ramsdeyl (3), Kallum Uilson (4) va Ben Uaytlar (4) o‘sha futbolchilar sirasiga kiradi. Ammo umumiy termaga qarab, tajribaning baribir yuqori ekanini aytish mumkin. Xususan, so‘nggi Yevropa chempionatida jamoada jami 641 marta maydonga tushgan futbolchilar bo‘lgan. 2018 yilgi mundialda esa bu ko‘rsatkich 449 taga teng edi. Ammo o‘sha musobaqalar Angliya uchun yarim final va final bilan yakun topgan.

Shuniyam ta’kidlash kerakki, hozirda turnirlar uchun 26 ta futbolchi jalb etishga ruxsat berilgan. Oldinlari esa umumiy jamoa 23 a’zodan tashkil topardi. Eslatib o‘tamiz, Angliya o‘zining guruh bahslarini 21 noyabr kuni, Eron termasiga qarshi o‘yin bilan boshlaydi.

ISMATOV J.