Кечагина Гарет Саутгейт Жаҳон чемпионати учун ўзининг танловларини эълон қилди. Рўйхатдан 26 та футболчи жой олган бўлиб, йиғилган футболчилар Англия тарихидаги энг тажрибали жамоалардан бирига айланди.

Жамоадан жой олган 26 футболчининг термадаги ўйинлари қўшиб ҳисоблаб чиқилганида, умумий 820 баҳс ўтказилганлиги маълум бўлди. Бу эса мутлақ рекорддан 1 тага камдир. Бу борада биринчи ўринни 2010 йилги Жаҳон чемпионатига олиб кетилган таркиб эгаллаган. Ўшанда жамоага Фабио Капелло бошчилик қилган. Жамоанинг умумий баҳслари сони 821 та бўлган. 2010 йилги таркибда Уэйн Руни, Стивен Жеррард, Фрэнк Лэмпард каби таниқли юлдузлар бор эди. Шунингдек, терма жамоада ўйин ўтказиш борасида Эшли Коул, Дэвид Жеймс, Жон Терри, Жермейн Дефо ҳамда Жо Коул олдинги ўринларни эгаллаган. Бироқ, бу статистикалар Жанубий Африка заминида инглизларга ёрдам бера олмаган. Улар нимчорак финалда Германияга 4-1 ҳисобида имкониятни бой бериб, ортга қайтишга мажбур бўлган.

Англиянинг бугунги таркиби ҳам жуда тажрибали. Улар ичида Рахим Стерлинг (79), Харри Кейн (75), Кайл Уокер (70) Жордан Хендерсон (70) энг кўп майдонга туширилган ўйинчилар саналади. Шунингдек, жамоада бир нечта янги ва тажрибасиз футболчилар ҳам бор. Жеймс Меддисон (1), Эрон Рамсдейл (3), Каллум Уилсон (4) ва Бен Уайтлар (4) ўша футболчилар сирасига киради. Аммо умумий термага қараб, тажрибанинг барибир юқори эканини айтиш мумкин. Хусусан, сўнгги Европа чемпионатида жамоада жами 641 марта майдонга тушган футболчилар бўлган. 2018 йилги мундиалда эса бу кўрсаткич 449 тага тенг эди. Аммо ўша мусобақалар Англия учун ярим финал ва финал билан якун топган.

Шуниям таъкидлаш керакки, ҳозирда турнирлар учун 26 та футболчи жалб этишга рухсат берилган. Олдинлари эса умумий жамоа 23 аъзодан ташкил топарди. Эслатиб ўтамиз, Англия ўзининг гуруҳ баҳсларини 21 ноябрь куни, Эрон термасига қарши ўйин билан бошлайди.

ИСМАТОВ Ж.