Italiyalik mutaxassis, avvalroq Doneskning "Shaxtyor" klubidagi faoliyati bilan tanilgan "Brayton" murabbiyi Roberto De Zerbi o‘zining sobiq jamoasidan ikki nafar futbolchini ingliz klubida ko‘rmoqchi, deb xabar beradi 90min.

Manba bergan xabarga ko‘ra, gap "Shaxtyor" klubining 21 yoshli burkina-fasolik hujumchisi - Lassina Traore va Donesk klubidan ijara asosida "Lion"da to‘p surayotgan 22 yoshli braziliyalik yarim himoyachi Tete haqida ketmoqda. Shu bilan birga, avvalroq “Shaxtyor”ning yana bir futbolchisi – ukrainalik himoyachi Nikolay Matviyenkoga qiziqish borligi haqida xabar berilgandi.

Yuqoridagi futbolchilarning transferiga De Zerbining yordamchisi Salvatore Monako ham qiziqmoqda. “Brayton” murabbiylar shtabi bu kuchayish natijasida mavsum yakunida Angliya Premyer-ligasining kuchli sakkiz jamoasidan joy olishiga ishonmoqda.

Eslatib o‘tamiz, Angliya chempionatining 15-turidan so‘ng "Brayton" 21 ochko jamg‘arib, musobaqa jadvalida oltinchi o‘rinda bormoqda.