Италиялик мутахассис, аввалроқ Донецкнинг "Шахтёр" клубидаги фаолияти билан танилган "Брайтон" мураббийи Роберто Де Зерби ўзининг собиқ жамоасидан икки нафар футболчини инглиз клубида кўрмоқчи, деб хабар беради 90min.
Манба берган хабарга кўра, гап "Шахтёр" клубининг 21 ёшли буркина-фасолик ҳужумчиси - Лассина Траоре ва Донецк клубидан ижара асосида "Лион"да тўп сураётган 22 ёшли бразилиялик ярим ҳимоячи Тете ҳақида кетмоқда. Шу билан бирга, аввалроқ “Шахтёр”нинг яна бир футболчиси – украиналик ҳимоячи Николай Матвиенкога қизиқиш борлиги ҳақида хабар берилганди.
Юқоридаги футболчиларнинг трансферига Де Зербининг ёрдамчиси Сальваторе Монако ҳам қизиқмоқда. “Брайтон” мураббийлар штаби бу кучайиш натижасида мавсум якунида Англия Премьер-лигасининг кучли саккиз жамоасидан жой олишига ишонмоқда.
Эслатиб ўтамиз, Англия чемпионатининг 15-туридан сўнг "Брайтон" 21 очко жамғариб, мусобақа жадвалида олтинчи ўринда бормоқда.
