Misrlik Muhammad Salohni bemalol APLdagi bosh «killer» sifatida ta’riflash mumkin.

Har holda, «Liverpul» hujumchisi chempionatning ko‘plab ishtirokchilariga «tortiq» etgan gollari soni bo‘yicha peshqadamlik qilmoqda. Uning uchun asosiy «qurbon» - «MYU».

Muhammad Saloh hattoki, sport formasi uncha yaxshi bo‘lmagan vaqtda ham gol urish yo‘lini topadi. Mana, u CHL guruh bosqichi 6-turidan o‘rin olgan «Napoli»ga qarshi o‘yin­da hisobni ochib, «Liverpul»­ning yakunda 2:0 hisobida ustun kelishiga asos yaratdi. Misrlik goleador ayni payt «PSJ» vakili Kilian Mbappe bilan birga turnir to‘p­urarlari ro‘yxatida 1-o‘rinni egallab turibdi (har ikki futbolchida 7tadan gol bor). Saloh oldinroq APL 11-turida «Manchester Siti» darvozasiga yagona g‘alaba golini yo‘llab, chempionat bo‘yicha «Liverpul» tarixidagi eng yaxshi to‘purarlar ro‘yxatida 2-o‘ringa ko‘tarilgandi. Aniqroq aytsak, u APLda 121-golini nishonlab, klub afsonasi Stiven Jerrard (120ta gol)dan o‘zib ketdi. «Liverpul» rekordchisi - Rob-bi Fauler hisobida esa 128ta gol bor. Demak, Misr futboli yulduzi mutlaq natijaga ham yaqin.

Umuman, Saloh  APLdagi eng kuchli snayperlardan biridir. Maqolaga ilova qilingan jadvaldan ko‘rinib turibdiki, u oxirgi 5 yillik statistika bo‘yicha APLning bir qator klublariga gol «tortiq» etish masalasida yetakchilik qilmoqda.

Oxirgi 5 yil (mavsum-2017|2018 - 25|10|2022 oralig‘i)da APLning eng kuchli 10ta klubiga hammadan ko‘p gol «ulashgan» futbolchilar

APLning hozirgi barcha ishtirokchi klublari Muhammad Salohdan loaqal 1ta gol qabul qilgan. «Liverpul»ning azaliy va prinsipial raqibi - «MYU» esa misrlik uchun eng sevimli raqiblardan biridir - 10ta gol.