"Chelsi" yarim himoyachisi Meyson Maunt London klubini tark etishi mumkin, deb xabar beradi The Guardian. Yarim himoyachi xizmatlariga "Liverpul" va "Yuventus" klublari qiziqish bildirmoqda.
Futbolchining "Chelsi" bilan shartnomasi tugashiga qariyb 18 oy qolgan bo‘lsa-da, shartnomani uzaytirish bo‘yicha muzokaralarda hali oldinga siljish bo‘lmadi. "Liverpul" va "Yuventus" vaziyatni kuzatib, futbolchini qanday qilib qo‘lga kiritish haqida o‘ylashmoqda.
23 yoshli angliyalik futbolchi yozdan beri "ko‘klar" rahbarlari bilan muzokaralar olib bormoqda, biroq hali yangi shartnoma borasida kelishib olinmagan. Yanvar oyida yana bir uchrashuv bo‘lib o‘tishi kutilmoqda, u hal qiluvchi bo‘lishi mumkin.
Maunt "Chelsi" tarbiyalanuvchisi bo‘lib, 2022/23 yilgi mavsumda jamoa safida barcha musobaqalarda 21 ta o‘yinda maydonga tushib, 2 ta gol urdi va 6 ta golli uzatmani amalga oshirdi. Transfermarkt portaliga ko‘ra futbolchining narxi 75 million yevroga baholanmoqda.