"Barselona" hujumchisi Usmon Dembele faoliyatini "Chelsi"da davom ettirishi mumkin, deb xabar beradi Sport Daily.
Nashrning yozishicha, London klubi 25 yoshli futbolchini o‘z safiga qo‘shib olish imkoniyatini ko‘rib chiqmoqda. “Ko‘klar” hujum chizig‘ini yaxshilashga intilmoqda, murabbiylar shtabi Raxim Sterling va Kay Xaversning o‘yinidan norozi.
“Barselona” rahbariyati bu kelishuvdan manfaatdor emas va fransiyalik hujumchi bilan shartnomani uzaytirishni rejalashtirmoqda. Dembelening kataloniyaliklar bilan amaldagi shartnomasi 2023/24 yilgi mavsumgacha amal qiladi.
25 yoshli hujumchi joriy mavsumda “Barselona” safida 20 ta o‘yinda maydonga tushib, 5 ta gol urdi va 7 ta golli uzatmani amalga oshirdi. Transfermarkt ma’lumotlariga ko‘ra futbolchining narxi 60 million yevroni tashkil qiladi.