Shotlandiya “Reynjers” jamoasi niderlandiyalik mutaxassis Jovanni van Bronxorstni bosh murabbiylikdan bo‘shatganini e’lon qildi. Bu haqda Glazgo jamoasi sayti xabar berdi.
47 yoshli Jovanni van Bronxorst 2021 yilning noyabridan beri “Reynjers”ni boshqarib kelayotgan edi. Uning jamoasi Shotlandiya chempionatining 15-turidan so‘ng 33 ochko bilan turnir jadvalida peshqadam “Seltik”dan 9 ochko ortda qolib, ikkinchi o‘rinda bormoqda. Chempionlar ligasida “Reynjers” “Liverpul”, “Napoli” va “Ayaks” bilan bir guruhda birorta ham ochko ololmadi.
Avvalroq futbolchilik faoliyati davomida “Arsenal” va “Barselona”da o‘ynagan van Bronxorst “Feyenoord” va “Guanchjou” klublarini boshqargan.
