Ayni kunlarda Isroil davlatida shaxmat bo‘yicha FIDE jamoalar o‘rtasidagi jahon chempionati davom etmoqda. O‘zbekiston terma jamoasi kecha chorak finalda Ukrainaga qarshi dona surib, 2ta to‘qnashuvda 3-1 va 2,5-1,5 hisobida raqibidan ustun keldi.

Yigitlarimizga yarim finalda Hindiston raqib bo‘ladigan bo‘ldi. Hindlar kecha chorak final bosqichi doirasida Fransiya bilan to‘qnash kelishdi. Ular o‘rtasidagi dastlabki 2ta to‘qnashuvda tomonlar bir martadan 3:1 hisobida g‘alaba qozonishdi. G‘olibni aniqlash uchun jamoalar o‘ta tezkor o‘yinda ishtirok etishdi. Unda osiyoliklar 2,5:1,5 hisobida g‘alaba qozonishdi va keyingi bosqichga yo‘l olishdi.

O‘zbekiston guruh bosqichida Hindiston bilan to‘qnash kelib, 3.5 — 0.5 hisobida ustun kelishgandi. Umid qilamiz, bu safar shaxmatchilarimiz bu raqibni mag‘lub etib, final yo‘llanmasini qo‘lga kiritishadi.

Ikkinchi yarim finalda esa Xitoy va Ispaniya terma jamoalari o‘zaro bahslashishadi.