Ganalik futbolchi Usmon Bukari Portugaliya darvozasiga gol urganidan so‘ng Krishtianu Ronalduning gol nishonlashini takrorladi.
Bukari ijtimoiy tarmoqlar orqali vaziyatga izoh berdi.
«Men ushbu harakatim tufayli ko‘pchilik tomonidan Ronalduga nisbatan hurmatsizlik qilganim haqidagi fikrlarni payqadim.
Bu haqiqat emas. Jahon chempionatidagi debyut o‘yinimda vatanim uchun urilgan goldan shunchaki hayajonga to‘lib ketdim, shuning uchun ham shunday bayram qildim.
Mening tarbiyam kattalarga hurmatsizlik qilishimga yo‘l qo‘ymaydi», deb yozadi Bukari.
Eslatib o‘tamiz, Gana terma jamoasi payshanba oqshomida Portugaliyaga 2:3 hisobida imkoniyatni boy bergan edi. Ikkinchi turda «qora yulduzlar» Janubiy Koreyaga qarshi bahs olib boradi.
