Xorvatiyalik Deyan Lovrenning misrlik Muhammad Salohga muhabbati boshqacha.

U butun uyiga goleador hujumchi suratlarini yopishtirib chiqqan. Hattoki, to‘shagi yopinchig‘iga ham Saloh surati bosilgan. Deyan shuningdek, har tong gazetalarni varaqlab, misrlik futbolchiga taalluqli xabarlar va fotolarni yig‘adi.

Muhammad Saloh 2017 yili «Liverpul» safiga qo‘shilgan payt Deyan Lovren «qizillar» sharafini himoya qilardi. Misrlikning yangi jamoa muhitiga osongina moslashganida Lovrenning xizmati katta. Shu-shu ikkisi kuchli do‘stlik rishtalari bilan bir-biriga mustahkam bog‘langan. Har holda, Lovren 2020 yili «Liverpul» bilan xayrlashgan bo‘lsada, u hamon misrlik hujumchi bilan aloqada.

Muhammad Saloh ham Deyan bilan tez-tez videoaloqaga chiqishini ko‘p bora ta’kidlaydi. Lovren yaqinda tongni qanday qarshi olishi aks ettirilgan videorolikni ijtimoiy tarmoqlarga joylashtirdi. Uning qisqacha tafsiloti: ayni payt Rossiyaning «Zenit» klubida o‘ynayotgan Deyan misrlik futbolchi tasviri bosilgan yotoq yopinchig‘i ustidan turadi, shippak, futbolka kiyadi - bu buyumlarda ham «Liverpul» yetakchisi surati. Keyin qo‘liga krujka oladi. Yana o‘sha manzara... Eng muhimi, Deyan krovati tepasida Salohning «MYU» darvozasiga urgan sehrli goli lahzasi tushirilgan katta plakat bor. Ehtimolki, bu xorvatiyalik himoyachining navbatdagi hazilidir, lekin nima bo‘lgan taqdirda ham, u barchasiga puxta tayyorgarlik ko‘rgani tayin.