Bugun Qirgulidagi "Neftchi" futbol klubi qarorgohida jamoa vakillari ishtirokida yig‘ilish bo‘lib o‘tdi. Yig‘ilishda tashkiliy masala ko‘rib chiqildi. Shu kungacha "Neftchi" PFK bosh direktori lavozimida ishlab kelgan Muysinjon Mehmonovning sog‘ligi bilan bog‘liq bo‘lgan muammo tufayli, Mo‘ysinjon Mehmonov o‘z xohishiga ko‘ra, egallab turgan lavozimini tark etdi. Jamoaga yangi rahbar etib Toshmatov Mansurbek O‘rinboyevich tasdiqlandi.

Yig‘ilishda Farg‘ona shahar hokimi, Neftchi PFK prezidenti Vosiljon Nazarov, Farg‘ona viloyati futbol assosiasiyasi vise prezidenti Nosirbek Otaqo‘ziyevlar ishtirok etishdi.
Joriy mavsumda Superligada jamoa oldiga qo‘yilgan vazifalarni a’do etishda sidqidildan mehnat qilib, yangi marralarni zabt etishda va amalga oshirishda qo‘shgan yuksak hissalari uchun Mo‘ysinjon Mehmonovga katta minnatdorchilik bildirib, to‘plagan tajribalaridan kelib chiqqan holda, ulardan kelajakda jamoani yanada rivojlantirish borasida fikr va maslahatlar olinishiga kelishib olindi.