«Chelsi» butun shonli tarixi davomida bir necha marta omadsiz davrlarni boshidan kechirishiga to‘g‘ri keldi. Biroq 2019-2020 yilgi mavsumdan boshlab jamoa o‘yiniga yana barqarorlik qayta boshladi, bunda klubning yorqin iste’dodlaridan biri bo‘lgan Meyson Mauntning xizmati katta. O‘sha paytdan boshlab jamoa bosh postiga kelgan 3 xil turli murabbiy qo‘l ostida ham Meysonga ishonch bildirilishida davom etdi.

Shundan kelib chiqib muxlislarda savol tug‘ilishi mumkin - o‘zi Maunt «Chelsi» uchun nima qildiki, maqtovlarga loyiq ko‘rilsa?

Lempard va Tuxel davrini qo‘shib hisoblaganda Meyson «ko‘klar» libosida jami 30 marta maydonga tushgan, biroq Potter klubga kelgach, unga deyarli har bir liga o‘yinida imkon berilmoqda.

Xo‘sh uning murabbiylar ishonchiga kirish siri nimada?

Yuqori moslashuvchanlik

Lempard qo‘l ostida (4-3-3) futbolchi asosan chap qanot vingeri sifatida faoliyat olib borgan, ayrim bahslarda sof hujumchi ortida ham harakat qilgan (4-2-3-1). Keyinchalik esa 3-4-3ni ko‘proq qo‘llovchi Tuxel qo‘l ostida esa u asosan hujum zonasida o‘ynadi, triolarning muhim qismiga aylandi. Bir so‘z bilan aytganda nemis mutaxassisi ingliz futbolchisining kreativligidan kelib chiqib, uni turli formatlarga solib ketaverdi. Shu sababli Meyson pressingni erta qabul qilishi uchun markazga ham qo‘yildi.

U 4-2-2-2 sxemasida o‘ng qanot vingeri bo‘lib ham harakat qila oladi. Menimcha, Mauntning ko‘p funksiyalilik qobiliyati unga sermahsullikda ko‘p imkoniyatlar beradi. Grem Potter esa ma’lumki, bir xil standartda o‘yin namotish etmaydi. Maunt uning davrida o‘ng qanot hujumchisi, 4-4-2da esa markaziy hujumchi sifatida faoliyat yuritadi. Ushbu ijrolardan ham ko‘rinib turibdiki, Tuxel hamda Potter kabi rotasiyani xush ko‘ruvchi murabbiylar uchun Maunt ayni muddao. Bundan tashqari yuqori texnik imkoniyatlar hamda kuchli atletizm to‘p uchun kurashda Meysonga qulayliklar yaratadi. Maunt 3 mavsum davomida jami 24 ta gol urdi. Xavfli vaziyatlar yaratishdan tashqari u to‘psiz ham pressingda yaxshi ishlaydi, mobillik yuqori. To‘psiz o‘yinni nazorat qilishda bugungi 3 himoyachi bilan o‘ynovchi klublar uchun Maunt kalit futbolchidir.

Yusufbek Saydaliyev