Jamal Musiala
Ko‘plar Germaniyaning guruh bosqichida qolib ketganini tanqid ostiga oldi. Bunga nemis muxlislarining haqqi bor. Ammo bu jamoaning bir a’zosi borki, u guruhdan qaytishga loyiq emasdi. Jamal Musialaning Qatar maydonlarida ko‘rsatgan o‘yinlari tahsinga sazovardir. 19 yoshli yarim himoyachi Kosta-Rika bilan bahsda 12 marta dribling ijro etgandi. Turnirni tark etishdan oldin Germaniya termasi ustozi Xans-Diter Flik shunday degandi: "Jamalning bugungi ko‘rsatgan o‘yiniga aql-bovar qilmaydi. Shunday futbolchining turnirdan ketayotgani achinarli. U fantastik o‘yinchi".
Enner Valensiya
Musialaku, hali yosh. Uning oldida ko‘plab turnirlar kutib turibdi. Ammo Ekvador terma jamoasining fenomenal hujumchisi Valensiya haqida bunday deya olmaymiz. U o‘z faoliyatidagi, balki, eng so‘nggi katta turnirda ishtirok etgandir. Valensiya allaqachon turnirni o‘z uyidan kuzata boshlagan. Ammo u Qatardagi chempionatning eng yaxshilaridan biriga aylana oldi. U A guruhidagi o‘yinlarda 3 ta gol urishga erishgandi. Uning harakatlarida 2,27 ochkolik ehtimoliy gol urish imkoniyati bor edi. Ekvadorlik hujumchi erta ketishga loyiq emasdi. Buni uning "Fenerbaxche"dagi o‘yinlari ham ko‘rsarib turibdi (15 ta gol).
Luis Chaves
Meksika terma jamoasi safidagi eng yorqin o‘yinchilar ichida Edson Alvares va Luis Chaveslar ajralib turdi. Xususan, Chavesning Saudiya Arabistoni darvozasiga jarima zarbasidan kiritgan goli mundialning eng chiroyli ijrolaridan biriga aylandi. Futbolchining o‘zi ushbu o‘yindan keyin shunday degandi: "Men juda ham xafaman. Biz jamoa sifatida yetarlicha harakat qilmadik. Balki, bizda yetarlicha xohish bo‘lmagandir, bilmadim. Ammo Jahon chempionatini o‘ta yomon tarzda tark etyapmiz". Chavesning o‘yinlari "Bayer Leverkuzen"da qiziqish uyg‘ota boshlagan. Yanvarda nemis klubi uni mahalliy "Pachuka" jamoasidan sotib olishga tayyorligi aytilgan.
Muhammad Al-Uvais
31 yoshli darvozanonning harakatlari fantastik darajada ajoyib edi. Uning qahramonana seyvlari sababli arabistonliklar Argentinani mag‘lubiyatga uchratgan. Shuningdek, Al-Uvais Meksika bilan ham zo‘r o‘ynadi. Garchand uning jamoasi o‘sha o‘yinni boy bergan bo‘lsada, Al- Uvais bo‘lmaganida hisob yirikroq ko‘rinish olgan bo‘lardi.
Mehdi Taremi
Eronning Qatardagi sarguzashtlari tez poyoniga yetdi. Afsuski, biz bu jamoa futbolchilarini vataniga qaytganida nimalar kutib turganini bilmaymiz. Chunki ular turnirning ilk bahsida davlat madhiyasini ijro etmadi. Shu sababli hukumat futbolchilar va ularninh oilasini bosim ostiga olgan. Shunday muammolar borligiga qaramasdan, Taremi o‘z jamoasiga guruh bahslarining qolga ikki o‘yinida katta yordam berdi. "Portu" hujumchisi bunday o‘yinlari bilan Qatarda qolishga loyiq edi. Biroq, buning iloji yo‘q.
ISMATOV J.
