Braziliya terma jamoasi bosh murabbiyi Tite jamoasi futbolchilari gollarni raqsga tushish orqali nishonlashda davom etishlarini aytdi.
Janubiy Koreya terma jamoasi bilan 1/8 final uchrashuvida (4:1) uchinchi gol urilganidan so‘ng Tite futbolchilarga qo‘shilib, golni raqs bilan nishonladi.
“Manchester Yunayted”ning sobiq sardori, irlandiyalik Roy Kin buni raqibga nisbatan hurmatsizlik, deb hisoblab, murabbiyni tanqid qildi.
“Bu biz tomondan hurmatsizlik emas. Bu bizning madaniyatimiz. Kimdir buni tushunmasligi va bilmagani uchun juda afsusdaman. Biz raqsga tushishda va bayram qilishda davom etamiz”, - dedi Tite Xorvatiyaga qarshi o‘yin oldidan o‘tkazilgan matbuot anjumanida.
Braziliya 9 dekabr kuni Qatarda bo‘lib o‘tayotgan JCH-2022 chorak finalida Xorvatiyaga qarshi maydonga tushadi.