Бразилия терма жамоаси бош мураббийи Тите жамоаси футболчилари голларни рақсга тушиш орқали нишонлашда давом этишларини айтди.
Жанубий Корея терма жамоаси билан 1/8 финал учрашувида (4:1) учинчи гол урилганидан сўнг Тите футболчиларга қўшилиб, голни рақс билан нишонлади.
“Манчестер Юнайтед”нинг собиқ сардори, ирландиялик Рой Кин буни рақибга нисбатан ҳурматсизлик, деб ҳисоблаб, мураббийни танқид қилди.
“Бу биз томондан ҳурматсизлик эмас. Бу бизнинг маданиятимиз. Кимдир буни тушунмаслиги ва билмагани учун жуда афсусдаман. Биз рақсга тушишда ва байрам қилишда давом этамиз”, - деди Тите Хорватияга қарши ўйин олдидан ўтказилган матбуот анжуманида.
Бразилия 9 декабрь куни Қатарда бўлиб ўтаётган ЖЧ-2022 чорак финалида Хорватияга қарши майдонга тушади.
