"Paxtakor" 15-chempionlikni qo‘lga kiritgan mavsumda chempionatlarning umumiy jadvalida ta’qibchilardan yanada ilgarilab oldi.

Jami 906 o‘yinda maydonga tushgan "Sherlar" 619 g‘alaba, 147 durang va 140 mag‘lubiyat qayd etgan holda 2004 ochko jamg‘argan. Joriy mavsumda jamoa 2000-golni urgan va 2000-ochkoni jamg‘argan birinchi klubga aylandi. Raqib darvozasiga umumiy 2032 gol urilib, 754 to‘p o‘tkazib yuborilgan. "Paxtakor" eng ko‘p g‘alaba qozongan, eng ko‘p to‘p kiritgan va eng ko‘p ochko jamg‘argan holda yetakchilik mavqeini mustahkamlab bormoqda. Bir o‘yinda o‘rtacha 2,12 ochkoga ega chiqilgan. Bu borada keyingi pog‘onada borayotgan "Neftchi" bilan o‘rtadagi farq kattalashmoqda. Jamoa farg‘onaliklarga nisbatan 138ta ko‘proq zafar quchib, 434ta ko‘proq gol urishga erishgan. Ochkolar farqi esa 427taga yetdi.

"Paxtakor" Superligada 15 karra chempionlikka sazovor bo‘lgan va mustaqillik davrida O‘zbekistonning eng ko‘p sovringa ega chiqqan jamoasi sanaladi. "Sherlar"ning umumiy sovrinlari soni 32tani tashkil etmoqda.