JCH-2022 chorak finali Niderlandiya – Argentina uchrashuvi vaqtida argentinaliklar himoyachisiga qalam otildi.
The Sun nashri xabariga ko‘ra, qalam Niderlandiya terma jamoasi zaxira o‘rindig‘i tomondan futbolchi tomon uchgan.
Niderlandiya va Argentina terma jamoalari o‘rtasidagi o‘yin hissiyotlar va sportchilarga xos bo‘lmagan xatti-harakatlarga boy bo‘ldi. To‘qnashuvlardan biri Argentina terma jamoasi yarim himoyachisi Leandro Paredesning Kodi Gakpoga nisbatan qo‘pollik ishlatganidan so‘ng, Niderlandiya zaxira o‘rindig‘i tomon to‘p tepganidan keyin sodir bo‘ldi. O‘shanda Niderlandiya sardori Virjil van Deyk Paredesga hujum qilgan va Paredesni himoya qilish uchun Naxuel Molina ham aralashgan. O‘sha paytda u tarafga Niderlandiya terma jamoasi zaxira o‘rindig‘i tomonidan qalam uloqtirilgan.
O‘yin jahon chempionatlari tarixidagi eng qo‘pol o‘yinlardan biri bo‘lib chiqdi: uchrashuvning bosh hakami Antonio Migel Mateu Laos jami 17 ta sariq kartochka ko‘rsatib, jahon chempionatining antirekordini o‘rnatdi.
