Buenos-Ayres polisiyasi Argentina terma jamoasining JCH-2022dagi g‘alaba sharafiga o‘tkazilgan chempionlik paradidan so‘ng poytaxt markazidagi Obelisk yodgorligida 13 kishini hibsga oldi, deb xabar bermoqda La Nacion.

Obelisk ichiga bir nechta odam kirishdi, ulardan biri hatto yodgorlikning eng tepasiga ko‘tarildi. Ushbu fanatni evakuasiya qilish uchun o‘t o‘chirish brigadasining aralashuvi talab qilingan. Shuningdek, bir qancha mushtlashuvlar va hibsga olishga qarshilik ko‘rsatish holatlari qayd etilgan, 9 nafar qurbonlar qayd etilgan.

Obelisk ichida 4 kishi, yodgorlik yonida esa yana 9 kishi hibsga olingan.

20 dekabr, seshanba kuni Argentina terma jamoasining chempionlik paradi bo‘lib o‘tdi. Futbolchilarni kutib olish uchun Buenos-Ayres ko‘chalariga 3 milliondan 4 milliongacha odam chiqdi. Avvaliga futbolchilar Obeliskgacha mashinada borishlari rejalashtirilgan edi, biroq ko‘chalarda odamlarning ko‘pligi tufayli transportning harakatlanishiga imkon qolmadi. Shu munosabat bilan futbolchilar avtobusni tark etib, vertolyotlarda uchib ketishdi.