"Manchester Yunayted" ustozi Erik ten Xag jamoa uchun sovrin yutishning o‘zi kamlik qilishi haqida gapirdi.
O‘tgan mavsumda uning jamoasi 58 ochko bilan mavsumni 6 o‘rinda yakunlagandi. Bu safar katta marralar ko‘zlangan. Yozda "MYU" rahbariyati 206,7 million funtni transferlarga sarflab yuborgandi. Ten Xag esa ketkazilgan pullarni oqlashi kerak.
Niderlandiyalik mutaxassis shunday deydi: "Doimo aytib kelaman, ishingizdan qoniqish sizni dangasalikka chorlaydi. Men o‘yinchilarni harakatlaridan xursandman. Ular har bir uchrashuvga to‘g‘ri yondoshmoqda. Ammo doimo kurashish uchun sabab topiladi. Standartlarni yuqori qo‘yish lozim. O‘zingizni qiynashga harakat qilishingiz kerak. Jamoada hammasi menga bog‘liq. APLda omon qolish uchun yuqori standartlar asosida harakat qilishingiz lozim. Chunki bu yerda dunyoning eng zo‘rlari to‘p suradi".
Ten Xag Niderlandiyada chempion bo‘lishga odatlangan. Yozda u zaif "MYU"ni qabul qilib oldi. 52 yoshli mutaxassis bunga shunday izoh beradi: "Men qayerga kelayotganimni yaxshi bilardim. Bu loyiha avvalgisidan ancha farq qiladi. Ha, "MYU" oxirgi paytda muxlislar kutgan darajada emas. Hozir to‘g‘ri yo‘lga tushib oldik. Ammo o‘zimiz bo‘lishimiz kerak bo‘lgan joydan ancha uzoqdamiz. Agarda sovrinlar uchun kurashmoqchi bo‘lsangiz, mayda detallargacha e’tiborli bo‘lishingiz kerak bo‘ladi. Agarda bizda to‘g‘ri reja, qattiq mehnat va yaxshi futbolchilar bo‘lsa, maqsadga erishish osonroq kechadi. Hozir beshinchi o‘rindamiz. Mavsumning katta qismi esa hali oldinda. Men yaxshi natijalar qayd eta olishimizga ishonaman".
Bugun "MYU" yana 9 ta JCH ishtirokchilari bo‘lgan futbolchilarni kutib oldi. Finallarda qatnashgan Lisandro Martines va Rafael Varanga yana bir hafta qo‘shimcha dam beriladigan bo‘ldi.
Qaytgan futbolchilar haqida ten Xag shunday dedi: "Futbolchilarni ham tushunish kerak. Ular 6 hafta davomida umuman boshqa dunyo, boshqa sheriklar va boshqa atmosferada harakat qildi. U yerdagi tizim va uslublar boshqa edi. Ular endilikda bizning uslubimiz, tizimimiz, qoida va qadriyatlarimizga qaytishi lozim. Biz marrani yuqori qo‘yganmiz. Agarda katta maqsadlaringiz bo‘lsa, ularga qarab yurish kerak. Standartlar yuqori bo‘lsagina, o‘sishga erisha olasiz. Aytib o‘tganimdek, jamoadan xursandman. Shu bilan birga ulardan ko‘prog‘ini talab etishda davom etaman".
ISMATOV J.
