Xalqaro tanaffus yakunlangani bilan ham "Liverpul"dagi muammolar tugamayapti. Jamoa FIFA kunlaridan so‘ng ham tarkib bilan bog‘liq jiddiy muammolarga duch kelishda davom etmoqda. Jamoa bosh murabbiyi Yurgen Klopp Angliya Premyer-ligasi 17-turidan o‘rin olgan "Aston Villa"ga qarshi o‘yin oldidan jarohatdagi futbolchilari haqida batafsil ma’lumot berdi.
Klopp Roberto Firmino va Jeyms Milner "Liverpul"ning keyingi ikki o‘yinini o‘tkazib yuborishini tasdiqladi. Futbolchilar Premyer-ligada "Aston Villa" va "Lester" bilan bahslarda ishtirok etmaydi, o‘yinlar mos ravishda 26 va 30 dekabr kunlari bo‘lib o‘tadi.
Firmino mashg‘ulotlarda jarohat olgani tufayli Liga kubogida "Man Siti"ga qarshi o‘ynamadi. Milner asosiy tarkibda maydonga tushdi, biroq o‘yin davomida uning son mushaklarida muammo paydo bo‘ldi va 38-daqiqada almashtirildi.
"Liverpul" bosh murabbiyi: "O‘shandan beri Milner bilan bog‘liq vaziyat yaxshilanmadi - u Firmino kabi bir nechta o‘yinlarni o‘tkazib yuboradi", - dedi.
Trent Aleksandr-Arnold kasalligi tufayli "Siti"ga qarshi bahsni o‘tkazib yubordi.
“Oksleyd-CHemberlen yaxshi, u Trent va ba’zi xodimlar kabi kasal edi. Hozirda biz ehtiyot bo‘lishimiz kerak. Bu oson vaziyat emas, o‘yinlarni rejalashtirish qiyin – biz “Siti”ga qarshi qanday o‘ynashni istayotganimizni 100 foiz bilardik, keyin esa so‘nggi daqiqada rejalarni o‘zgartirishga majbur bo‘ldik. "Aston Villa" bilan o‘yin oldidan ham biz moslashuvchan bo‘lishimiz kerak", - dedi bosh murabbiy.
“Virjil mashg‘ulot o‘tkazmoqda, hammasi yaxshi, shuning uchun u o‘ynaydi. Umid qilamanki, Trent yaxshiroq bo‘ladi, u butun mashg‘ulotni jamoa bilan o‘tkaza olmadi. Vaziyat qanday rivojlanishini ko‘ramiz.
Ibrahima Konate "Aston Villa"ga qarshi o‘ynamaydi. Fransiyaga jahon chempionati finaliga chiqishga yordam berganidan so‘ng unga ta’til berildi. Shuningdek, Luis Dias, Diogu Jota, Kyortis Jons va Artur Melo ham jarohati tufayli navbatdagi bahslarda maydonga tusha olmaydi.
