Xalqaro futbol assosiasiyalari federasiyasi (FIFA) O‘zbekistonda ayollar ffutboini rivojlantirishga qaratilgan loyihaga pul ajratadigan bo‘ldi. Bu haqda O‘zPFL rahbari Diyor Imomxo‘jayev xabar tarqatdi.

"O‘tgan yillar davomida O‘zPFL ayollar Oliy ligasi, Birinchi ligasi, kubogi, superkubogi uchrashuvlarini o‘tkazib keldi. 2023 yildan boshlab bularning barchasi bilan O‘FA shug‘ullanadi. Butun dunyoda shunday.

Biz so‘nggi uch yilda:

— ayollar jamoalaridan badal puli olmaydigan bo‘ldik;
— yillik taqdirlash marosimida ayollar va erkaklar sovrinlarini maksimal darajada tenglashtirdik;
— 2 ta ayollar jamoasini OFK lisenziyalashidan muvaffaqiyatli o‘tkazdik va bu ishni qila olgan Osiyoning 4 davlatidan biriga aylandik;
— klublar qoshida ayollar U16 jamoasini tashkil qilishga erishdik;
— ayollar futbolining muhim bellashuvlarini internet orqali translyasiya qilishga o‘tdik.

Yuqoridagilarni inobatga olgan holda FIFA ayollar futbolini rivojlantirish loyihasi bo‘yicha O‘zbekistonga ma’lum miqdorda pul ajratishga qaror qildi. Bizningcha, o‘tgan yillar davomida Liga bu boradagi vazifalarni haminqadar bajarishga erishdi. O‘FA imkoniyatlari nisbatan kengroq ekanligidan kelib chiqsak, ayollar futboli yanada yaxshi darajaga chiqishiga ishonamiz", — deyiladi Imomxo‘jayevning telegram-kanalidagi xabarda.