“Andijon” hamda “Navbahor-farm” jamoalari o‘rtasidagi o‘yindan so‘ng namanganliklar bosh murabbiyi Rashid G‘ofurov o‘z fikrlarini quyidagicha bildirdi:
- O‘yindan olgan taassurotlarimiz yaxshi. Biz shunaqa o‘yin bo‘lishini kutgandik. O‘zimizdan bir pog‘ona baland jamoaga qarshi uchrashuv bizga tajriba beradi. O‘zimni jamoamga ishongan holda aytamanki, yutqazishimizga ishonmagandim. Agar 1:0 hisobida qolganida biz bunga loyiq bo‘lmasdik. Durang adolatli natija. Lekin hozir hamma jamoada yangi o‘yinchilar ko‘rikdan o‘tkazilyapti. Shuni hisobga olganda, “Andijon”ning bu hali oxirgi tarkibi emas, deb o‘ylayman. Jamoa yanada kuchayadi. Futbolchilarimdan ko‘nglim to‘ldi.
Klub Superligaga qaytdi. Tarkibini shakllantirib olsa, hammasi yaxshi bo‘ladi. Bu yerdagi futbolchilardan ko‘ra, bosh murabbiy Aleksandr Xomyakovga katta ishonch bildiraman. Negaki, uni juda yaxshi mutaxassis sifatida bilaman. Uxlamasdan izlanadigan murabbiy. Taktika tanlashda ham usta. Yangi klubida yaqindagina ish boshladi. Xomyakovni ko‘p narsani yutishga qodir, murabbiy deb hisoblayman.
Shaxsan men bu mutaxassisga ishonaman. Har taraflama kuchli murabbiy. Uni yaxshi bilaman. “Mash’al”da to‘p surgan paytlarimdan bilamanki, “Andijon”ning birinchi navbatdagi yutug‘i shu bo‘ldiki, kuchli mutaxassisni olib keldi.
Bundan tashqari, klub bosh direktori Ulug‘bek Mirzayev ham futbolga yangilik kirita oladigan inson. Birga ishlaganmiz. Katta-katta rejalarni amalga oshiradigan mutaxassis sifatida bilaman. Viloyat hokimi yordam berib tursa, “Andijon”ning kelajagi shu ikkita inson bilan yanada yorqin bo‘ladi, - deydi Rashid G‘ofurov.
