Nafaqat Qatar mundiali, balki barcha JCHlari tarixidagi 1-raqamli sensasiya maqomiga asosiy nomzod bo‘lgan Marokash - Ispaniya uchrashuvidan keyin (Marokashning g‘alabasi emas, ispanlarning 3ta (!) penaltini golga aylantira olmaganlari nazarda tutilmoqda), Luis Enrikening naqadar og‘ir ruhiy zarbaga duch kelganligini xayolan his etdim
Quyidagi material bilan tanishgach, ispaniyalik mutaxassisning har qanday qiyinchilik va omadsizlikka dosh bera oladigan irodali, tirishqoq inson ekanligiga amin bo‘ldim. Marhamat, Luis Enrikening shu paytgacha biz bilmagan xislatlari bilan tanishing.
Velosayohatlar shaydosi
«Selta»ga kelishidan avval Enrike velosipedda Alp tog‘larida sayr qilishni, doimo eng xavfli so‘qmoqlardan ko‘tarilishni xush ko‘rardi. «Barselona»ga kelganida ham bu odatidan voz kechmay, uyidan 15 km. uzoqlikdagi bazaga nuqul velosipedda qatnardi. YECHLning «Seltik»ka qarshi guruh bosqichi uchrashuvi arafasida u velosipeddan yiqilib, tirsagidan jarohat oldi va qo‘li bintlangan holda jamoani boshqardi. Shogirdlari «Seltik» darvozasiga 7ta javobsiz gol urishdi.
Ba’zan Enrike kasbdoshlarimizning qitmir savollariga qaytargan javoblarida velosipedga oid kinoyalardan foydalanadi: «Agar buvimda g‘ildiraklar bo‘lganida, u velosiped bo‘lardi» , «Malaga» «Real»ni yengishiga ishonasizmi? savolining javobi.
Luis Enrike marafonni ham yaxshi ko‘radi
Bir paytlar u sahroda haftalik yugurish musobaqasida ishtirok etgan, quruq yerda uxlab, ochlikka bardosh bergandi. Futbolchilik faoliyatidan keyin Luis hech qanday tayyorgarliksiz marafonda qatnashdi. Biroq bunga ko‘nikmagan oyoqlari 1 soatdan keyin shishib ketdi. Futbolda yashil maydondagi tezkor reydlar orasida to‘xtalishlar bo‘ladi, marafonda esa uzoq vaqt davomida bir maromda yugurish talab etiladi.
Uzoqqa cho‘zilgan qo‘shimcha mashg‘ulotlardan keyin, nihoyat, 2007 yilda Luis Floresiyadagi marafonda qatnashdi va 3 soatga yetmagan vaqt ichida 42 km. masofani ortda qoldirdi.
Bir yildan so‘ng Enrike Saxara marafoniga yo‘l oldi. Bu 6 kunlik seriya bo‘lib, ishtirokchilardan 250 km. masofani bosib o‘tishlari lozim edi. Darvoqe, ayollar musobaqasida rossiyalik Natalya Sedix, Irina Petrova, Valentina Lyaxovalar g‘olib chiqishdi. Luis ham jiddiy sinovdan o‘tdi, yerda uxlash, och qolish, yuvinmaslik, tungi sovuq va kunduzgi jazirama issiqni ajoyib tarzda ta’riflab berdi. Bu safar u kattaroq o‘lchamdagi poyafzaldan foydalandi. Chunki oyoqlari yana shisha boshlagandi. Lekin u marraga yetib bordi.
Ironman triatlon seriyasidan o‘tdi
Mazkur musobaqa tanaffuslarsiz 3 bosqichdan iborat: suzish, velosipedda yurish, yugurish. Enrike Frankfurtdagi shunday turnirda ishtirok etib, 10 soatu 19 daqiqa ichida 4 km. masofani suzib o‘tdi, velosipedda 180 km. masofani ortda qoldirdi va 42 km.li marafonni oxiriga yetkazdi.
Luis futbolchilik davridayoq triatlon bilan shug‘ullanish niyatida bo‘lgan, ammo musobaqani xayoliga ham keltirmagandi. Orzusi ro‘yobga chiqdi, lekin tizzalari tufayli bu sportdan voz kechdi. Aytgancha, «Barsa»ni boshqargan davrida Enrike o‘zining triatlondagi ustozini o‘rinbosarlar jamoasiga taklif etgandi. Futbolchilikdan keyin Avstraliyada yashagan davrida Luis syorfing bilan ham shug‘ullangan.
Mashg‘ulotlarni quruvchilar havozasidan kuzatardi
Murabbiy Enrike «Selta»da mashg‘ulot jarayonini quruvchilar havozasi ustida turgan holda kuzatardi. Aytishicha, bu usul unga mashg‘ulot qay tarzda o‘tayotganini yaxshiroq tushunish imkoniyatini berarkan. Ko‘rsatmalarni u megafon yordamida yetkazardi.
«Barselona»da kondisionerni zalga o‘rnatish va undan minimal temperaturada foydalanishni talab qilgandi
Umuman, murabbiy «Barsa»ni jurnalistlardan imkon qadar olisroq olib yurishga intilardi. Masalan, ularga samolyotda jamoa bilan birgalikda parvoz qilishni taqiqlab qo‘ygandi.
Liftda qamalib qolib, Kosovoga qarshi o‘yinga kech qolgandi
Uchrashuvga terma jamoa avtobusda murabbiylarsiz yo‘l olgan, ular o‘z mashinalarida yetib borishgandi. Murabbiylar deyarli kechikmadilar - o‘yin sal avvalroq boshlangandi. Enrike o‘z yordamchilarining jamoa bilan birga ekanliklari, o‘yin rejasidan xabardorliklarini aytgandi.
Shveysariya bilan bo‘lgan YEML doirasidagi uchrashuvdan keyin kasbdoshlarimizdan biri murabbiy bilan uchrasha olmay, mashinasini to‘xtatmagan holda sirtdan intervyu olgandi. Enrike uning savollariga javob bergach, jurnalistning dugonasiga ham savol berishni taklif etdi. Biroq qiz taklifni rad etdi. Zaldagilar bir kulishib olishgach, matbuot anjumani davom etdi.
Ovqatlanish rejimiga o‘ta talabchan, parhez borasida shaxsan o‘zi ishlaydi
Enrike terma jamoadagi faoliyatini taomnoma menyusini o‘zgartirish bilan boshlagandi: qovurilgan taomlar o‘rniga par bilan pishirilgan ovqatlar, iloji boricha ko‘proq meva, sabzavotlar. Nonushta 9:00da - barcha uchun majburiy.
To‘g‘ri ovqatlanish - Luis Enrike uchun o‘ta muhim masala. «Barselona»da u Klaudio Bravo uchun parhez taomlar reseptini tayyorlab bergan, mavsumlar oralig‘ida darvozabon 5 kg. vazn tashlagandi. «Selta»da uning parhez ilmidagi salohiyatini sinovdan o‘tkazgan Nolito naq 10 kg. og‘irlikdan forig‘ bo‘lgan va faoliyatini saqlab qolgani uchun Enrikedan minnatdor bo‘lgandi. Shuningdek, Luis Suares ham «Barselona»da nomdosh ustozining parhezga oid tavsiyalaridan samarali foydalangan.
Eng yaxshi misol - Enrikening o‘zi. Hozir u 52 yoshda, 18 yildan beri to‘p tepishdan yiroq. Biroq ortiqcha vazndan zarracha bo‘lsada, asar ham yo‘q.
Murabbiy ba’zan tvitterda ko‘rinish berib turadi
Instagramda 165000 obunachi uchun ulkan fan-sahifa ochgan bo‘lsada, uni yuritmaydi. Tvitterdagi ixlosmandlari esa 800000dan ortiq. Yevro-2021 turnirida Luis Sankt-Peterburg stadionining go‘zalligiga yuksak baho bergandi.
Oilasi xususida deyarli gapirmaydi, qizchasining fojiali o‘limidan tashqari
9 yoshli qizalog‘ining vafoti tufayli Enrike Ispaniya terma jamoasini tark etdi. Yaqinda Luis Enrike turmush o‘rtog‘i Yelena bilan turmush qurganining 25 yilligini nishonladi. To‘ydan avval juftlik bir necha yil uchrashib yurgan. Yelena iqtisodchi kasbini egallagan bo‘lsada, styuardessa bo‘lib ishlagan, Luis bilan shu tariqa tanishgandi. Aytishlaricha, o‘g‘li bolaligida futbolga qiziqqan bo‘lsada, sug‘urta kompaniyasida ishlashni ma’qul ko‘rgan. Qizi Sira esa ot sporti bilan shug‘ullanadi, yoshlar chempionatida Ispaniya chempionatida g‘olib chiqqan, xalqaro musobaqalarda mamlakat sharafini himoya qiladi. Sira o‘z otasi haqida shunday degandi: «U o‘ziga xos xarakter sohibi. Lekin o‘ta oilaparvar ota. Biz bilan turli o‘yinlarda qatnashadi, Rojdestvoda qayergadir birga boramiz».
A.ABDUVALIXO‘JAYEV tayyorladi.
